آخری سانس تک مومن

آخری سانس تک مومن

ہماری  زندگی  میں  ایسے  واقعات  کبھی  کبھی  ہو  جاتے  ہیں  کہ  بہت  زیادہ  محبت  کرنے  والوں  کے   درمیان  ایسی  نفرت  پیدا  ہو  جاتی  ہے  کہ  ہم ایک  دوسرے  کا چہرہ  دیکھنا  گوارہ  نہیں  کرتے۔

کسی کو ہم ساری زندگی ادب و احترام سے پکاریں‘ بے انتہا عزت و تکریم دیں‘ اچھے اچھے القاب سے نوازیں ‘ جی حضوری کریں لیکن پھر کسی موڑ پہ آکر کبھی  بھی  کسی بھی صورت میں ایک جھوٹی سی گالی دے دیں  ‘ جسے باپ کہتے تھے  اُسے ’’سالا ‘‘   کہہ دیں‘  جسے  اُستاد  کہتے  تھے  اُسے  ’’ چور ‘‘  کہہ دیں۔

تو  یہ  ہماری  ساری  زندگی کی ادب و  احترام‘  عزت  و  تکریم  کو  خاک  میں  ملا نے  کے  لئے  کافی  ہو جاتی ہے۔

سارے  رشتے  بھی  اسی  ایک  گالی  سے  ختم  ہو  جاتی ہے ۔ ہمارے  دل   میں ایسی کدورت  جنم  لیتی  ہے  جسے  ہم زندگی  کی بقیہ  ایام میں بھلانا چاہیں بھی تو بھلا نہیں پاتے۔

بالکل  اسی  طرح  عقیدہ ٴ   توحید   کا   معاملہ  بھی   ہے۔

ایمان‘  اسلام‘  اخلاق   کے   تمام   تقاضے   اسی   عقیدہٴ    توحید   کے   گرد   گردش   کر تی    ہیں۔

ہم  سب  جانتے  ہیں کہ  ایمان   و   اسلام   کی   بنیاد  توحید   ہی   ہے۔

اس   بنیاد   میں  اگر  کسی بھی وقت فرق آگیا  اور یہ  عقیدہ  خدانخواستہ  مجروح  ہو  گیا  تو  پھر  زندگی  کی بقیہ  ایام میں

ایمان  و  اسلام‘  عبادت و  تقویٰ‘  صدقہ  و خیرات  سب  کے  سب  عند اللہ  ’’ نا معتبر ‘‘  قرار  پائے  گا۔

اسی  طرح  ہم  ایک  اچھے  شہری  ہو سکتے  ہیں‘  ہو  سکتا  ہے کہ پچھلے  بیس پچیس سالوں سے  ہم  اچھے  شہری  ہونے  کا  ثبوت  دیتے  آئیں  ہوں  لیکن  اسکے  باوجود  اگر  ہم  کہیں  ڈاکہ  ڈالنے  میں  ملوث  ہو  جائیں  یا   کسی  کو  عمداً  قتل  کر  دیں  تو  ہمارے  اچھے  شہری  ہونے  کا  پچھلا  ریکارڈ  ہمیں  مجرم  ہونے  سے  اور  سزا  پانے  سے  نہیں  بچا  سکے  گا۔

توحید  کا  معاملہ  بھی  ایسا  ہی  ہے۔

اگر  ہم  ساری  زندگی  اللہ  کی  وحدانیت  پر  قائم  ر ہیں  لیکن  موت کے  وقت‘  جس  وقت  شیطان  اپنی  آخری  داوٴ  چلنے  کی  حتی  المقدور  کوشش  کرتا  ہے  اگر  خدانخواستہ  انسان  کے  دل  میں  شکوک و شبہات  اور  انکار  کا  غلبہ  ہو  جائے  اور  وہ شرک و کفر  میں  پڑ  جائے  تو  جہنم  سے  نجات کی گنجائش کہاں سے نکلے گی۔

اسی لئے   مومن بندہ  ’’ امید  اور  خوف ‘‘  کے  درمیان  رہتا ہے یعنی جہاں وہ   اللہ  کی رحمت کی وسعت اور عظیم بخشش کو  دیکھتے  ہوئے  یہ  امید  اور  یقین  رکھتا  ہے  کہ  اللہ سبخانہ و تعالیٰ  اپنی رحمت‘   بخشش  و  کرم سے اسکی مغفرت کر کے اسے  اپنی  جنت  سے  نوازے  گا وہیں  وہ  اللہ  کی  بڑایٴ  و  کبریایٴ  اور اپنی  کوتاہی  و  معصیت  پہ  نظر  رکھتے  ہوئے  اللہ  کی  ناراضگی  اور  عذاب  کے  خوف  سے  بھی  ڈرتا   رہتا  ہے' اور  ڈر تا ہے  کہ  کہیں  اُسے  جہنم  میں  نہ  ڈال  دیا جائے۔

آج اس فتنے کے  دور میں‘  جب  ہر  لمحہ  ہم سب طرح  طرح کی معصیتوں میں ملوث ہیں‘  اللہ  جانے  کس کس  کا  ایمان  آخری  سانس  تک  باقی  رہے  گا۔  ہمیں  ڈرنا  چاہئے  کہ  خدانخواستہ  کسی  گناہ  کی  وجہ  کر  اللہ سبحانہ و تعالیٰ  ہمارے  دل  پھیر  نہ  دیں۔  کیونکہ رسولِ مقبول صلی اللہ علیہ و سلم نے ہمیں آگاہ کیا ہے کہ  ہمارے  دل اللہ تعالیٰ  کی انگلیوں  کے  درمیان  ہیں۔  اللہ تعالیٰ  جیسے  چاہتا  ہے  انہیں  پھیر  دیتا  ہے۔  

مسلمان  گھرانے  میں  ہوتے  ہوےٴ  ہم  سب  ہی  قریب  بڑی  بڑی  گناہوں  کو  جانتے  ہیں  اور  ان  سے  بچنے  کی  بھی  حتی المقدور  کوششیں  کرتے  ہیں  لیکن  چھوٹی  چھوٹی  ایسی  بے شمار  باتیں  ہیں  جو  گناہ  و  معصیت  کے  زمرے  میں  آتیں  ہیں'   ہم  ان  کی  پرواہ  ہی  نہیں  کرتے  اور  یہی  چھوٹی  چھوٹی  گناہیں  ہمارے  دلوں  کو  زنگ  آلود  کرنے  میں  زیادہ  کردار  ادا  کرتا  ہے۔

لہذا  ہمیں  ہر  لمحہ ہر چھوٹی بڑی  گناہوں  سے  بچنے  کی  سعی  کرنی  چاہئے  اور اور ایمان  پر  بقاء  کے لئے  نبی کریم  صلی اللہ علیہ و سلم  کی سکھایٴ ہویٴ  یہ  دعا کثرت سے پڑھتے رہنا چاہئے:

يا مُقَلِّبَ الْقُلُوبِ ثَبِّتْ قَلْبِي عَلَي دِينِكَ

’’ اے دلوں کو پھیرنے والے! ہمارے دلوں کو اپنے دین پر ثابت رکھ۔‘‘

اور جیسا کہ قرآن میں اللہ سبحانہ و تعالیٰ نے خود ہی ہمیں سکھایا ہے:

رَبَّنَا لَا تُزِغْ قُلُوبَنَا بَعْدَ إِذْ هَدَيْتَنَا وَهَبْ لَنَا مِن لَّدُنكَ رَحْمَةً ۚ إِنَّكَ أَنتَ الْوَهَّابُ ﴿٨﴾ رَبَّنَا إِنَّكَ جَامِعُ النَّاسِ لِيَوْمٍ لَّا رَيْبَ فِيهِ ۚ إِنَّ اللَّـهَ لَا يُخْلِفُ الْمِيعَادَ ﴿٩﴾  سورة آل عمران

’’ اے ہمارے رب! ہمیں ہدایت دینے کے بعد ہمارے دل ٹیڑھے نہ کردے اور ہمیں اپنے پاس سے رحمت  عطا فرما،  یقیناً  تو  ہی بہت  بڑی عطا دینے واﻻ ہے۔ اے ہمارے رب!  تو  یقیناً  لوگوں کو ایک دن  جمع  کرنے  واﻻ  ہے  جس  کے  آنے  میں  کوئی  شک  نہیں،  یقیناً اللہ  تعالیٰ  وعده  خلافی  نہی ں کرتا۔‘‘

یقیناً   اس  میں  کویٴ  شک  نہیں  کہ  ہمارا  رب  اپنے  وعدے  کے  مطابق  ایک  دن  ہمیں  جمع  کرے  گا۔ لہذا  اگر آخری سانس تک ہم توحید باری تعالیٰ پہ توحید کے تقاضے کے مطابق قائم رہیں ‘  ہمارا ایمان سلامت رہے اور ہمارا خاتمہ باالخیر ہو' اور اللہ کی رحمت سے ہمیں موت کے وقت کلمہ نصیب ہو تب ہی ہم سرخرویٴ کے ساتھ اپنے رب سے ملنے کی آرزو کر سکتے ہیں۔

کیونکہ رحمت دو عالم  صلی اللہ علیہ و سلم نے فرمایا :

من مات علی شییٔ بعثہ اللہ علیہ (رواہ الحاکم)

’’ جس حالت میں آدمی فوت ہوگا، اسی پر اسے قیامت کے دن اٹھایا جائے گا‘‘

یعنی اعمال کا دارومدار خاتمہ پر ہے اور انسان جس حالت میں زندگی بسر کرتا ہے، اسی حالت میں اس کی موت واقع ہوتی ہے اور جس حالت میں انسان کی موت واقع ہوگی، اسی حالت میں وہ قیامت کے دن قبر سے اٹھایا جائے گا۔

لہذا

        آج  ضروری ہے کہ ہم قرآن و سنت کے مطابق:

 اللہ پر ایمان لائیں یعنی توحید کو سمجھ لیں اور شرک سے دور ہو جائیں

سنتوں کو اپنا لیں اور بدعتوں کو چھوڑ دیں

نبی کریم  کے اعلیٰ اخلاق کو اپنا ئیں اور برے اخلاق کو ترک کر دیں

صلہ رحمی کریں اور قطعہ رحمی نہ کریں

نیکیاں  کر یں اور صغائر و کبائر معصیتوں کو ترک کر دیں                                                                

اور اپنا ظاہر و باطن پاک کریں

                                                     ۔۔۔۔۔   تب ہی ممکن ہے آخری سانس تک مومن رہنا

اے اللہ ہمیں ایسا بنا دے کہ

                                           ہم ہر لمحہ مومن رہیں

                                          ہم  امید اور خوف کے درمیان تجھ سے ڈرتے ہوئے زندگی گزاریں

                                          ہمارے تمام کام سنوار دے اور ہمارے اعمال کی اصلاح فرما دے

                                         اور اے اللہ  اپنے فضل و کرم سے ہمیں اچھا خاتمہ نصیب فرما

                                         بے شک تو سننے والا،قبول کرنے والا اور بہت قریب ہے۔

                                         آمین یا رب العالین۔

اَللّٰھُمَّ  صَلِّ  عَلٰی  مُحَمَّدٍ  وَّ  عَلٰٓی  اٰلِ   مُحَمَّدٍ  کَمَا  صَلَّیْتَ  عَلٰٓی  اِبْرَاھِیْمَ  وَ عَلٰٓی  اٰلِ  اِبْرَاھِیْمَ  اِنَّکَ  حَمِیْدٌ  مَّجِیْدٌ

اَللّٰھُمَّ  بَارِکْ  عَلٰی  مُحَمَّدٍ  وَّ عَلٰٓی  اٰلِ  مُحَمَّدٍ  کَمَا  بَارَکْتَ  عَلٰٓی  اِبْرَاھِیْمَ  وَ عَلٰٓی  اٰلِ  اِبْرَاھِیْمَ  اِنَّکَ  حَمِیْدٌ  مَّجِیْدٌ